Գերի ընկած Նարեկ Սարդարյանի կինը Խնձորեսկում վարչապետից հետաքրքրվում էր ամուսնու մասին

Ինչպես արդեն հայտնել ենք, ՀՀ վարչապետ Նիկոլ Փաշինյանը, Պաշտպանության նախարար Դավիթ Տոնոյանն ու ՀՀ բարձրագույն սպայակազմի ներկայացուցիչները այսօր Սյունիքի մարզի Խնձորեսկ համայնքում մասնակցել են «Սպարապետի օրվան» նվիրված միջոցառմանը:

Միջոցառումից հետո հարգանքի տուրք մատուցվեց Հայրենական Մեծ պատերազմում եւ Արցախյան ազատամարտում զոհված հերոսների հիշատակին։

Խնձորեսկում նրանց է մոտեցել հուլիսին Ադրբեջանի սահմանին հայտնված ու գերի ընկած Նարեկ Սարդարյանի կինն ու հետաքրքրվել ամուսնուց՝ նշելով, որ վերջինիս վիճակի մասին իրենք որեւէ տեղեկություն չունեն:

«Չենք կարող ոչինչ ասել, ցավոք սրտի, որովհետև գիտեք, դժբախտաբար նա ոչ թե բարեկամի, այլ հակառակորդի մոտ է ընկել»,,- ի պատասխաննշեց վարչապետը:

Այդ պահին նրան ուղեկցող պաշտպանության նախարար Դավիթ Տոնոյանն ընդհատեց Նիկոլ Փաշինյանին՝ հավելելով, որ ինքը կզրուցի տիկնոջ հետ:

Հիշեցնենք, որ Նարեկ Սարդարյանը որպես անհետ կորած որոնվում էր հուլիսի 8-ից: Գորայք համայնքի Սպանդարյան ջրամբարի մոտակայքում գտնվող արոտավայրում նա ձիով գնացել էր անասունների հոտի ուղղությամբ եւ չէր վերադարձել: Պարզվել է, որ Սարդարյանը կորած անասունները որոնելու արդյունքում մոլորվել եւ անցել է ԱՀ Նախիջեւանի տարածք: Նարեկ Սարդարյանի՝ Ադրբեջանում հայտնվելու դեպքի առթիվ ՀՀ ազգային անվտանգության ծառայությունում հարուցվել է քրեական գործ:

Ներքին Խնձորեսկ գյուղի բնակիչ Սարդարյանի հարազատները գանգատ են ներկայացրել Մարդու իրավունքների եվրոպական դատարան՝ բարձրացնելով նրա կյանքի, խոշտանգումներից զերծ մնալու եւ այլ իրավունքների վերաբերյալ հարցեր:

Նարեկ Սարդարյանի կնոջ ու վարչապետի հանդիպումը՝ 10:50 րոպեից