Այսօր մեկնարկում է ձմեռային զորակոչը։ Զինվորական կենտրոնական հավաքակայանում Հայաստանի զինված ուժերի գլխավոր շտաբի պետ Արտակ Դավթյանը լրագրողների հետ ճեպազրույցում ասաց՝ առանձնահատուկ ուշադրություն են դարձնելու զինակոչիկների տեղափոխման ընթացքում անվտանգության կանոնների պահպանմանը։
«Մեծ փոփոխություններ չեն լինելու։ Զորակոչիկների առողջությանն ենք ուշադրություն դարձնում, սահմանափակումներին, որպեսզի հետագայում կարողանանք ճիշտ նշանակումներ կատարենք զորքերում։
Եվ իհարկե, քանի որ ձմեռ է, առանձնապես ուշադրություն ենք դարձնում տեղափոխման ընթացքում անվտանգության կանոնների պահպանմանը, որպեսզի մեքենաներով բոլորին անվտանգ հասցնենք իրենց ծառայության վայրը», — ասաց Դավթյանը։
