Անապաստան կենդանիների վնասազերծման համայնքային կենտրոնը նոր շենք ու կլինիկա ունի, որտեղ կա կենդանիների պահման կարանտինային գոտի, կացարան, ժամանակակից պայմաններով հագեցած վիրահատարան:
«Ֆեյսբուք»-ի իր էջում այս մասին գրել է Երևանի քաղաքապետի մամուլի խոսնակ Հակոբ Կարապետյանը:
«Անցած տարի մի քանի ընդդիմադիր գործընկեր դժգոհում էր շների պահման ու վնասազերծման «անմարդկային» պայմաններից: Վիճակը բավարար չէր, իհարկե, բայց նոր կլինիկան այդ ժամանակ դեռ կառուցվում էր, իսկ կենտրոնի մասնագետներն աշխատում էին փաստացի «դաշտային պայմաններում»: Հիմա կլինիկան պատրաստ է՝ ընդլայնվելու պլաններով»,- նշել է Կարապետյանը և հավելել, որ քաղաքապետ Հայկ Մարությանն այցելել է կենտրոն՝ ծանոթանալու աշխատանքի պայմաններին:
Նոր կլինիկայում կա՝ կենդանիների պահման կարանտինային գոտի, կացարան, կամանակակից պայմաններով հագեցած վիրահատարան:
Անապաստան կենդանիների վնասազերծման համայնքային ծրագրի առաջին փուլով կենդանիները հավաքվելու են, ստերջացվեն և վերադարձվեն նախնական բնակության վայրերը: Երկրորդ փուլով հաշվառվելու են և չիպավորվեն (sic!) տանը պահվող կենդանիները, որպեսզի վերահսկվի պոպուլյացիան:
Կարապետյանը տեղեկացրել է նաև, որ քաղաքային իշխանությունը մտադիր է կիրառել կենդանու պահման համար նախատեսված տարեկան 5000 դրամ տեղական տուրքի համաներում (որը հիմա էլ փաստացի չի գանձվում), պայմանով, որ կենդանասերները և կենդանատերերը կգրանցեն իրենց խնամյալներին: