Սյունիքի մարզի ընդհանուր իրավասության դատարանում Նապոլեոն Օհանյանի նախագահությամբ ավարտվել է Վարդան Հ.-ի գործի դատական քննությունը:
Դատական պրակտիկայում այս հոդվածով քրեական գործի հարուցում ու մեղադրական դատավճռի կայացում հազվադեպ է պատահում:
Ըստ մեղադրանքի՝ 2020 թվականի փետրվարի 22-ին, ժամը 17-ի սահմաններում Սյունիքի մարզի Արծվանիկ վարչական բնակավայրի կենտրոնական մասում Վարդան Հ.-ն կենդանու նկատմամբ դաժան վերաբերմունք դրսևորելու դիտավորությամբ իրեն ամրակցված «ՕՊ ՍԿՍ» մոդելի որսորդական ակոսափող հրազենից կրակելու եղանակով «ընդհատել է կենդանու՝ շան կյանքը»:
Մարտի 11-ին Վարդան Հ.-ի նկատմամբ որպես խափանման միջոց կիրառվել է չհեռանալու մասին ստորագրությունը:
Իսկ մարտի 23-ին քրեական գործի նախաքննությունն ավարտվել է, գործն ուղարկվել է Սյունիքի մարզի ընդհանուր իրավասության դատարան:
Վարդան Հ.-ն մեղսագրված արարքում իրեն լիովին մեղավոր է ճանաչել, զղջացել է:
Դատարանը հաշվի է առել, որ ամբաստանյալին մեղսագրված արարքին տրվել է ճիշտ քրեաիրավական գնահատական:
Դատարանը հաշվի է առել, որ Վարդան Հ.-ն առաջին անգամ է հանցավոր արարք կատարել, մեղսագրված արարքը դասվում է ոչ մեծ ծանրության հանցավոր արարքների շարքին:
Դատարանը եզրահանգել է, որ ամբաստանյալի անձը, կատարած արարքի համար մեղքն ընդունելը, զղջալը, դրական բնութագիրը հաշվի առնելով՝ նրա նկատմամբ կարելի է սահմանել հոդվածի սանկցիայով նախատեսված նվազ խիստ պատժատեսակ՝ տուգանք:
Վարդան Հ.-ն մեղավոր է ճանաչվել ՀՀ քրեական օրենսգրքի 258.2 հոդվածի 1-ին մասով և դատապարտվել է տուգանքի՝ 120 հազար դրամի չափով:
Դատավճիռը չի բողոքարկվել և մտել է օրինական ուժի մեջ:
