«Իմ քայլը» խմբակցության ղեկավար Լիլիթ Մակունցը «Լուսավոր Հայաստան» խմբակցության ղեկավար Էդմոն Մարուքյանին առաջարկում է վերադառնալ քաղաքական բովանդակային դաշտ:
Այսօր լրագրողների հետ ճեպազրույցի ընթացքում Մակունցն անդրադարձավ Մարուքյանի երեկվա տեսաուղերձին՝ այն համարելով մեծամասամբ ոչ քաղաքական:
«Կոչ եմ անում իմ հարգելի գործընկերոջը վերադառնալ քաղաքական բովանդակային դաշտ և Ազգային ժողովի աշխատանքները վերադարձնենք բովանդակային փուլ»,-ընդգծեց Լիլիթ Մակունցը:
Նրա խոսքով, չնայած «Լուսավոր Հայաստան» խմբակցությունը որևէ կերպ չի ընդունում միջադեպի առնչությամբ մեղքի իր բաժինը, այնուամենյանիվ, Մակունցը լիահույս է, որ խմբակցությունում կանեն հետևություններ, թեկուզ ոչ հանրային ու հրապարակային:
«Իմ քայլը» խմբակցության ղեկավարն անդրադարձավ նաև խորհրդարանի ամբիոնից Սասուն Միքայելյանի երեկվա ելույթին: Նշեց՝ կարծում է, որ այն բավական հստակ էր, հիշեցնում էր ընդհանրապես, թե ինչ է տեղի ունեցել նախկինում, և ելույթը պետք է ընկալել բարոյական դաշտում:
