«Շնորհակալություն, ցտեսություն»։ 168․am-ի տեղեկություններով այսպես է պատասխանել Արթուր Վանեցյանը ՀՔԾ-ին։
Նրան տեղեկացրել են, որ նյութեր են նախապատրաստվում, և որ իր անունը ևս շրջանառվում է, ու 10 օրվա ընթացքում կտեղեկացնեն` քրեական գործ հարուցելու են թե ոչ: ՀՔԾ հրավիրելու նպատակն ըստ էության դա է եղել:
Ըստ աղբյուրի տեղեկությունների` ԱԱԾ նախկին տնօրենը ցուցմունք չի տվել։
Ավելի վաղ հայտնել էինք՝ ԱԱԾ նախկին տնօրեն Արթուր Վանեցյանը Հատուկ քննչական ծառայություն է հրավիրվել Վատիկանում ՀՀ նախկին դեսպան Միքայել Մինասյանի տեսանյութի հիման վրա նախապատրաստվող նյութերի շրջանակում:
Այս մասին ֆեյսբուքյան իր էջում գրել է Վանեցյանի փաստաբան Լուսինե Սահակյանը:
Նրա գրառումը՝ ստորեւ.
«Հայաստանի Հանրապետության Հատուկ քննչական ծառայությունում նյութեր են նախապատրաստվում Միքայել Մինասյանի կողմից վերջերս արված հայտարարության հետ կապված։
Այսօր նյութերի նախապատրաստության շրջանակներում ՀՔԾ է հրավիրված եղել Արթուր Վանեցյանը։ Ընթանում է իրավական գործընթաց, որի վերաբերյալ հավելյալ մեկնաբանություններից զերծ ենք մնում»։
