Բժշկական օգնություն եւ սպասարկում իրականացնող կազմակերպություններում առկա են մեկուսարաններ, որտեղ տեղափոխվում են ջերմող, սուր շնչառական վարակի ախտանիշներով պացիենտները, եւ անհրաժեշտության դեպքում իրականացվում է նմուշառում։
Այս մասին հայտնեցին ՀՀ առողջապահության նախարարությունից մեր այն հարցմանն ի պատասխան, թե ինչպե՞ս է կարգավորվում հիվանդանոցներում ընդունելության հարցը, երբ քաղաքացին, կարող է դիմել տեղի ԲԿ եւ չիմանալով, որ հիվանդ է COVID-19-ով, վարակել բուժանձնակազմին եւ մյուս պացիենտներին։
Ըստ պատասխանի՝ կորոնավիրուսային վարակի դեմ պայքարի միջոցառումների կազմակերպման, իրականացման ու գնահատման գործընթացներին մասնակցող ԲԿ-ի մասնագետներն առաջնորդվում են առողջապահության նախարարի հրամանով հաստատված մեթոդական ուղեցույցներով։
Նախարարությունից նաեւ հավելեցին՝ «թոքաբորբ» ախտորոշմամբ պացիենտներին իրականացվում է ՊՇՌ մեթոդաբանությամբ թեստավորում։
Հիշեցնենք, որ մինչեւ մեր հարցման պատասխանը ստանալն այս խնդրի վերաբերյալ խոսել էր նաեւ ՀՀ առողջապահության նախարար Արսեն Թորոսյանը՝ նշելով, որ Հայաստանում բոլոր ԲԿ-ները հրահանգավորված են՝ աշխատանքները ճիշտ իրականացնելու համար։ Բժիշկները պետք է պահպանեն անձնական պաշտպանության կանոնները: Հետեւելով ուղարկված ալգորիթմներին՝ որոշեն՝ ինչպես տեսակավորել դեպքերը․ տեղափոխել այլ հիվանդանոց, թե առկա առանձնահատկություններից ելնելով՝ թողնել նույն վայրում՝ պահպանելով հակահամաճարակաբանական բոլոր միջոցառումները։
Նյութի աբյուր՝ Հայկական Ժամանակ
