Այսօր Մարալիկում գրանցվել է կորոնավիրուսից մահվան ևս մեկ դեպք: 90-ամյա տարեց տղամարդը, որի նմուշառումը գիշերը դրական արդյունք էր տվել, ախտորոշման հաստատումից 1 ժամ անց մահացել է:
«Մարալիկի առողջության կենտրոնի բուժաշխատողների մեկը, որի մոտ հաստատվել էր կորոնավիրուս, պարզվեց, որ տանը խնամում է իր 90-ամյա հայրիկին: Օրեր շարունակ մենք քննարկում էինք պապիկի հոսպիտալացման հարցը, բայց քանի որ վիճակը ծանր էր, որոշում կայացվեց չտեղաշարժել: Պապիկից նմուշառում կատարվել է իր տանը, նա ինֆեկցիոն հիվանդանոց չի տեղափոխվել, տարածված տեղեկությունն իրականությանը չի համապատասխանում:
Թեստի պատասխանը լուսադեմին ստացվեց, դրական էր: Ցավոք, մեկ ժամ անց նա մահացավ: Եթե չմահանար, պետք է տեղափոխեինք ինֆեկցիոնում մեկուսացված իր աղջկա հիվանդասենյակ, քանի որ ուրիշ խնամող չուներ տանը: 90-ամյա պապիկին, հարազատների հետ խորհրդակցելուց հետո, հուղարկավորեցին այսօր՝ կեսօրին»,- տեղեկացրեց Շիրակի մարզպետ Տիգրան Պետրոսյանը:
Ըստ մարզպետի՝ այս պահին Մարալիկ և Ձորակապ համայնքներում վիճակը վերահսկելի է, տեղում մեքենաների ու քաղաքացիների երթևեկությունը հսկում են ոստիկանության աշխատակիցները: Տարանցիկ ավտոմեքենաների և բեռնատարների երթևեկությունը թույլատրվում է, իսկ մարդատարներինը՝ միայն խիստ անհրաժեշտության դեպքում:
Այսօր Հիանդությունների վերահսկման և կանխարգելման ազգային կենտրոնի Շիրակի մասնաճյուղի աշխատակիցները կատարել են ևս 5 բուժաշխատողների նմուշառում: Նրանք կենտրոնի հերթափոխով աշխատողներն են, որոնք մյուսների հետ շփում չեն ունեցել, հաստատվել է կորոնավիրուսով վարակման ևս մեկ դրական դեպք:
Այսպիսով, Մարալիկում այս պահին կա 19 հաստատված վարակակիր: Նրանք մեկուսացված են Գյումրիի ինֆեկցիոն հիվանդանոցում:
Մարալիկում և Ձորակապում շարունակվում են ախտահանման միջոցառումները:
