Բյուջեից մոտ կես միլիարդ դրամի հափշտակությունը կազմակերպելու մեջ մեղադրվող Սերժ Սարգսյանը երեկ դատարանի առջև հավաքված համախոհներին խնդրելով վերադառնալ տուն՝ հորդորեց չմոռանալ Հայաստանի անվտանգության մասին։ Հետո իր կյանքի «գերագույն նպատակից» խոսեց՝ Լեռնային Ղարաբաղը երբեք չի լինելու Ադրբեջանի կազմում:
Ըստ քրեական գործի՝ իր նախագահության ժամանակաշրջանում Սերժ Սարգսյանն այնպես է արել, որ հողօգտագործողներին գարնան գյուղատնտեսական աշխատանքների համար մատչելի գներով դիզելային վառելանյութ տրամադրի իր մտերիմ Բարսեղ Բեգլարյանին պատկանող «Ֆլեշ» ընկերությունը, մինչդեռ ավելի էժան գնային առաջարկ էր ներկայացրել «Մաքսհուր» ընկերությունը։
Սարգսյանը մեղադրանքը չի ընդունում, իսկ նրա ղեկավարած Հանրապետական կուսակցությունը և փաստաբանները պնդում են, թե պետության նախկին ղեկավարի նկատմամբ քաղաքական հետապնդում է իրականացվում։
Նաև այս թեմայի շուրջ է «Ազատություն»-ը զրուցել Ազգային ժողովի պաշտպանության և անվտանգության հարցերի հանձնաժողովի նախագահ, «Իմ քայլը» խմբակցության պատգամավոր Անդրանիկ Քոչարյանի հետ։
