Մարդու իրավունքների եվրոպական դատարանը ճանաչել է 2010-ին ադրբեջանական գերության մեջ մահացած՝ Թթուջուր գյուղի բնակիչ, 20-ամյա Մանվել Սարիբեկյանի բոլոր խախտված իրավունքները: Վճիռը հրապարակվել է քիչ առաջ:
ՄԻԵԴ-ը վճռել է, որ խախտվել է մարդու իրավունքների կոնվենցիայի երկրորդ հոդվածը, ըստ որի հարգանք չի ցուցաբերվել Մանվել Սարիբեկյանի մահվան փաստի և դրա հետաքննության գործընթացի նկատմամբ: Սարիբեկյանի խոշտանգման փաստով դատարանն արձանագրել է նաև կոնվենցիայի երրորդ հոդվածի պահանջների խախտում: Եվրադատարանի վճռի համաձայն, ադրբեջանական կողմը եռամսյա ժամկետում պետք է վճարի 62 հազար եվրոյի փախհատուցում, որից 60 հազարը ոչ նյութական վնասի փոխատուցումն է, իսկ 2 հազարը՝ դատական ծախսերինը:
Հիշեցնենք, որ ՄԻԵԴ-ում Սարիբեկյանի ընտանիքի ներկայացուցիչ Արտակ Զեյնալյանը «Լուրեր»-ին նաև տեղեկացրել է, որ Մարդու իրավունքների եվրոպական դատարանում ավարտվել է 2014-ի օգոստոսի 7-ին Ադրբեջանում գերեվարված, մեկ օր անց դաժանաբար սպանված Չինարիի բնակիչ Կարեն Պետրոսյանի և 2014-ի հունվարի 28-ին կրկին Ադրբեջանում գերի ընկած ու խոշտանգված Վերին Կարմիրաղբյուրի բնակիչ Մամիկոն Խոջոյանի գործի քննությունը: Այս գործերով դեռ սպասվում են Եվրադատարանի վճիռները:
