Եթե ֆեյսբուքյան օգտատեր Նանե Արզումանյանին ասելու բան ունենամ, ապա այստեղ կասեմ, որեւիցե ձեւով անհանգստանալու բան չունեմ։ Այս մասին այսօր՝ հունվարի 23-ին, ԱԺ-ում լրագրողների հետ զրույցում ասաց ԱԺ փոխնախագահ Ալեն Սիմոնյանը՝ անդրադառնալով այն տեսակետին, թե ֆեյսբուքյան իր էջում իր կողմից կատարված մեկնաբանությունը պետք է քննի Էթիկայի հանձնաժողովը։
«Ես նման բան Արզումանյանի հասցեին չեմ գրել, ես նրան պատասխանել եմ՝ դուք-ով։ Հետագայում, որ խոսքը գնացել է ծիտիկների մասին, ասել եմ՝ ծիտիկներին շան տեղ պետք չէ դնել։ Եթե ինչ-որ մարդիկ կան, որ ծիտիկների հետ կապված ուզում են դիմել էթիկայի հանձնաժողովին, որ ծիտիկներին ասել եմ՝ շան տեղ չդնել, դեմ չեմ, թող դիմեն, կարող են նաեւ ՄԱԿ-ին դիմել եւ կենդանիների պաշտպանության որոշ կազմակերպություններին»,- ասաց ԱԺ փոխնախագահը։
Նա նշեց, եթե որեւէ մեկին ինչ-որ ասելու բան ունենա, ապա՝ կասի. «Տիկին Արզումանյանի հետ իմ զրույցն ավարտել եմ այն պահին, երբ իր հարցին՝ դուք-ով պատասխանել եմ։ Եթե ինչ-որ մեկին մի բան եմ ասում, ապա ասում եմ՝ ուղիղ ու դա հայտնի է։ Եթե Արզումանյանի թե այլ մեկի բան ասելու ունենամ, ապա այստեղ կասեմ, որեւիցե ձեւով անհանգստանալու բան չունեմ»։