Մյուս տարի Կառավարությունը ոչ թե 271 մլն դրամ կծախսի Ամանորի միջոցառումների համար, այլ՝ 570 մլն դրամ: Այս մասին Կառավարություն-ԱԺ հարցուպատասխանի ժամանակ հայտարարեց վարչապետ Նիկոլ Փաշինյանը:
«Սրանով ոչ միայն օտարերկրյա զբոսաշրջիկների կհրավիրենք Հայաստան, այլև կօգնենք, որ ՀՀ քաղաքացիներն Ամանորը նշեն ՀՀ-ում: Մյուս տարի արդեն ոչ թե 9 մլրդ դրամ հավելյալ շրջանառություն կապահովենք, այլ 20 մլրդ դրամ, 25 մլրդ դրամ, 30 մլրդ դրամ: Սա ասում եմ, որ մեր հարգելի քննադատները պատրաստ լինեն, որ մյուս տարի այդ գումարը պատրաստ ենք նաև կրկնապատկել»,- նշեց Նիկոլ Փաշինյանը:
Հիշեցնենք, որ այսօր իր ֆեյսբուքյան ուղիղ եթերում վարչապետը հայտարարել էր, որ 2019 թ. դեկտեմբերի 26-ից 2020թ.-ի հունվարի 6-ն ընկած ժամանակահատվածում նախորդ տարվա համեմատ 9 միլիարդ 307 միլիոն դրամի հավելյալ շրջանառություն է կատարվել Հայաստանում: Ամանորին Երևանում կատարվող տոնակատարությունների համար ծախսվել էր 271 միլիոն դրամ:
Խորհրդարանում հնչած հարցին, թե ինչ չափանիշներով է կատարվել հաշվարկը, ինչպես կհիմնավորեք, որ հավելյալ դրամաշրջանառության աճին նպաստել է ծախսված գումարը, Նիկոլ Փաշինյանը պատասխանեց. «Ո՞րն է կանխավարկածը, այս տոնակատարությունը գրավել է քաղաքացիների, ես ինքս համոզվել եմ՝ սփյուռքից ահռելի մեծ թվով մարդ է եկել, մեծ թվով զբոսաշրջիկներ, որոնք Երևանում 1-2 օր անցկացնելուց հետո գնացել են մարզեր՝ տեսարժան վայրեր, և նաև կրպակներում, ռեստորաններում առևտուր են արել և այդ առևտուրը ՀԴՄ-ներով արձանագրվել է»:
